Sur dall‘ uniun

L’uniun ei vegnida fundada igl onn 1964. Actualmein dumbra ella rodund 50 commembers da tuttas vegliadetgnas. El center dallas activitads stat la buna cumpignia denter ils commembers a caschun dad occurenzas sco la sera da pulenta ni excursiuns sportivas.

Historia

A caschun dalla radunonza dils 23 da december 1964 ei l’Uniun sportiva Péz Ault vegnida fundada cugl intent principal da menar atras las cuorsas da skis e sustener il sport el vitg da Surin.

Igl onn 1975 ha la radunonza generala decidiu dad organisar l’emprema ga in jass. Duront rodund 20 onns ei il jass staus in punct fix el program dall’uniun. Medemamein igl onn 1975 ha l’emprema cuorsa da Sogn Silvester giu liug, in slalom en cumbinaziun cun in percours da cuorsa liunga per ils commembers dall’uniun.

Tochen igl onn 1978 existiva l’uniun mo ord umens.

Igl onn 1984 ha l’uniun cumprau in runal da skis, e quei malgrad ch’ei steva buca bein cun las finanzas. Cun organisar ina lottaria ed entras ina contribuziun dall’uniun da dunnas eis ei la finala reussiu da finanziar il runal. Per l’uniun ei il runal mai staus ina gronda fatschenta. Tonaton eis el staus en funcziun 12 onns, damai ch’el vegneva appreziaus zun fetg dils vischins da Surin e contuorn. Beinenqualin ha fatg a Surin sias empremas experientschas sin skis.

L’uniun ha era organisau biars onns la sera famigliara, plirs onns ensemen cun l’uniun da dunnas.

L’emprema fiasta da curtgin ei vegnida menada atras igl onn 1990. Igl onn 1994 ha la fiasta schizun giu liug duront dus dis. Dapi igl onn 1995 ei quell’occurrenza enconuschenta sco „sera da pulenta“. Cun excepziun digl onn 2001 ei la sera da pulenta vegnida menada atras mintg’onn, dapi igl onn 2002 a Silgin.

Igl onn 2003 ha l’uniun acquistau ina tenda che vegn nezegiada per la sera da pulenta.

Actualmein dumbra l’uniun varga 50 commembras e commembers. Mintg’onn passentan ils commembers in di da skis a Val. Mintga dus onn vegn organisau in viadi. Finanziadas vegnan quellas excursiuns cun las entradas dalla sera da pulenta.

Organisar cuorsas da skis ei buca pli igl intent dall’uniun. L’uniun porscha oz als vischins da Surin e contuorn la pusseivladad da sentupar e passentar temps communablamein. Damai ch’ei setracta dalla suletta uniun a Surin ei quei in’impurtonta funcziun.